केज शहरातून आठवीच्या विद्यार्थिनीचे अपहरण
रोखठोक न्युज प्रतिनिधी
केज शहरातून आठवीच्या वर्गातील अल्पवयीन मुलीचे अपहरण करणाऱ्या – अज्ञात व्यक्तीविरुद्ध केज पोलिस ठाण्यात अपहरणाचा गुन्हा दाखल झाला आहे.
केज तालुक्यातील एका गावातील आठवीच्या वर्गात शिक्षण घेत असलेल्या अल्पवयीन मुलीचे कुटुंब शहरात वास्तव्यास असून ५ मार्च २०२४ रोजी सकाळी ७.३० वाजता वडिलांनी मुलीसह तिच्या भावास दुचाकीवरून शाळेत सोडले. त्यानंतर दुपारी १२.३० वाजता तिचा भाऊ शाळेतून घरी पोहोचला. मात्र, ही मुलगी घरी न आल्याने वडिलांनी शाळेत जाऊन तिचा शोध घेतला तेव्हा शाळेत मुलीचे दप्तर व डबा वर्गात आढळून आला. शाळेच्या मधल्या
सुटीपासून मुलगी दिसून आली नाही. वडिलांनी नातेवाइकांशी संपर्क साधला. मात्र तिचा शोध लागत नसल्याने तिचे अज्ञात व्यक्तीने अपहरण केल्याची तक्रार केज पोलिस ठाण्यात दिल्यानंतर अज्ञातावर अपहरणाचा गुन्हा दाखल झाला आहे.
पोलिसांनी केले आवाहन
मुलीचा रंग गोरा, उंची पाच फूट, अंगात पांढरा टॉप, लाल पँट, लाल ओढणी असा शाळेचा पंजाबी ड्रेस असून पायात काळ्या रंगाची सायंडल आहे. कानात साधी फुले, हनुवटीवर मस, नाकात खडा अशा वर्णनाची मुलगी आढळून आल्यास पोलिस ठाण्याशी संपर्क साधावा असे आवाहन तपासी अधिकारी आनंद शिंदे यांनी केले आहे.