केज शहरात मटका बुक्कीवर पोलिसांची धाड; दोन आरोपींविरुद्ध गुन्हा दाखल

केज शहरात मटका बुक्कीवर पोलिसांची धाड; दोन आरोपींविरुद्ध गुन्हा दाखल

रोखठोक न्यूज वार्ताहर 

शहरातील केज बीड रोड परिसरात मटका जुगार सुरू असल्याची माहिती मिळताच सहायक पोलीस अधीक्षक वेंकटराम यांच्या नेतृत्वाखाली पोलिसांनी २२ एप्रिल २०२६ रोजी दुपारी धाड टाकून कारवाई केली. या कारवाईत दोन आरोपींना ताब्यात घेऊन त्यांच्याविरुद्ध गुन्हा दाखल करण्यात आला आहे.

या प्रकरणी फिर्यादी म्हणून बालासाहेब नरहरी डापकर (वय ४५, नोकरी, उपविभागीय पोलीस अधिकारी कार्यालय, केज) यांनी केज पोलीस ठाण्यात फिर्याद दिली आहे.

पोलिसांनी दिलेल्या माहितीनुसार, आरोपी

1. लहू लक्ष्मण गिरी (रा. समर्थनगर, केज)

2. ईस्माईल ईनामदार (रा. काजळा, ता. केज)

हे दोघे केज बीड रोडच्या उत्तर बाजूस गणेश वडापाय सेंटरसमोरील बाकड्यावर बसून बेकायदेशीरपणे मटका जुगार चालवत असल्याचे आढळून आले.

कारवाईदरम्यान पोलिसांनी लहू गिरी याच्या अंगझडतीतून विविध नोटांमध्ये एकूण ₹17,080 रोख रक्कम जप्त केली. तसेच मटका जुगारासाठी वापरले जाणारे दोन मोबाईल फोन (Realme 11 Pro 5G व Oppo A5 5G) जप्त करण्यात आले असून त्यांची एकत्रित किंमत अंदाजे 40,000 आहे. अशाप्रकारे एकूण 57,080 चा मुद्देमाल पोलिसांनी ताब्यात घेतला आहे.

चौकशीत आरोपी मटका जुगार “कल्याण, मिलन डे, मिलन नाईट, श्रीदेवी डे, श्रीदेवी नाईट, टाइम बाजार” या नावाने चालवत असल्याचे उघड झाले. तसेच आरोपी लहू गिरी हा १० टक्के कमिशनवर ईस्माईल ईनामदार याला हा व्यवसाय देत असल्याची कबुली दिल्याचे पोलिसांनी सांगितले.

या प्रकरणी दोन्ही आरोपींविरुद्ध भारतीय न्याय संहिता कलम 49(3)(5) तसेच महाराष्ट्र जुगार कायदा कलम 12 (अ) अंतर्गत गुन्हा दाखल करण्यात आला असून पुढील तपास पोलीस करत आहेत.