घरकुलाच्या पैशांवर लाचेचा डल्ला!
‘प्रति मस्टर १०० रुपये’ मागणारा ग्रामरोजगार सेवक एसीबीच्या जाळ्यात; बनेश्वर मंदिराजवळ रंगेहाथ अटक.
बनसारोळा येथील घटना
बनसारोळा | प्रतिनिधी
गरीबांना घरकुलाचा लाभ मिळवून देण्यासाठी राबविण्यात येणाऱ्या पंतप्रधान घरकुल योजनेलाच भ्रष्टाचाराची कीड लागल्याचे धक्कादायक वास्तव समोर आले आहे. घरकुल योजनेअंतर्गत मस्टरचे पैसे काढून देण्यासाठी तब्बल प्रति मस्टर १०० रुपये लाचेची मागणी करणाऱ्या बनसारोळा ग्रामपंचायतीच्या ग्रामरोजगार सेवकाला लाचलुचपत प्रतिबंधक विभागाने (एसीबी) रंगेहाथ पकडून बेड्या ठोकल्या.
या कारवाईतील आरोपीचे नाव गोविंद सोपान गोरे (वय ५०), रा. बनसारोळा, ता. केज, जि. बीड असे आहे.
मिळालेल्या माहितीनुसार, तक्रारदाराच्या पीएम घरकुल योजनेअंतर्गत ३० मस्टरचे पैसे काढून देण्यासाठी गोरे यांनी प्रति मस्टर १०० रुपये, अशा एकूण ३,००० रुपयांच्या लाचेची मागणी केली होती. तक्रारदाराने याबाबत लाचलुचपत प्रतिबंधक विभागाकडे तक्रार दाखल केली. त्यानंतर एसीबीने तक्रारीची पडताळणी करून सापळा रचला.
ठरल्याप्रमाणे बनेश्वर मंदिराजवळ तक्रारदाराकडून ३,००० रुपयांची लाच स्वीकारताना गोविंद गोरे यांना एसीबीच्या पथकाने रंगेहाथ पकडले. या कारवाईमुळे बनसारोळा ग्रामपंचायत परिसरात मोठी खळबळ उडाली असून, सरकारी योजनांमध्ये लाचखोरी किती खोलवर रुजली आहे, याची पुन्हा एकदा प्रचिती आली आहे.
ही कारवाई लाचलुचपत प्रतिबंधक विभाग, बीड येथील उपअधीक्षक सोपान चिटमपल्ले यांच्या मार्गदर्शनाखाली एसीबीच्या पथकाने केली. या प्रकरणी युसुफवडगाव पोलीस ठाण्यात गुन्हा दाखल करण्याची प्रक्रिया सुरू आहे.
रोखठोक प्रश्न
गरीबांच्या घरकुलाच्या पैशांवर डल्ला मारण्याचे धाडस सरकारी कर्मचाऱ्यांना नेमके कोणाच्या पाठबळावर येते? जनतेच्या हक्काच्या योजनांमध्ये लाच मागणाऱ्यांवर केवळ गुन्हेच नव्हे, तर कठोर प्रशासकीय कारवाईही झाली पाहिजे, अशी संतप्त प्रतिक्रिया नागरिकांतून व्यक्त होत आहे.