चोरीचा संशय की माणुसकीचा खून? दोन मित्रांना ट्रॅक्टरला बांधून बेदम मारहाण; एकाचा दुर्दैवी मृत्यू!
संतापजनक घटना; पाच जणांविरुद्ध खुनाचा गुन्हा, चार आरोपी पोलिसांच्या ताब्यात
रोखठोक न्यूज | वार्ताहर
बीड जिल्ह्यातील नेकनूर जवळ वाणगाव परिसरात माणुसकीला काळिमा फासणारी आणि कायदा हातात घेण्याच्या प्रवृत्तीचा थरकाप उडवणारी घटना समोर आली आहे. जुनी दुचाकी खरेदी करण्यासाठी धाराशिव जिल्ह्यातून बीडमध्ये आलेल्या दोन मित्रांना चक्क दुचाकी चोर असल्याच्या संशयावरून काही जणांनी लक्ष्य केले. संशयाच्या नावाखाली या दोघांवर अमानुष अत्याचार करण्यात आले. लाथाबुक्क्या, पट्ट्यांनी बेदम मारहाण केल्यानंतर दोघांनाही ट्रॅक्टरला बांधून ठेवण्यात आले. या क्रूर मारहाणीत संभाजी सारूक या तरुणाचा उपचारादरम्यान मृत्यू झाला असून दुसरा तरुण गंभीर जखमी झाला आहे.
संशयाच्या नावाखाली माणुसकीचा अंत!
मिळालेल्या माहितीनुसार, धाराशिव जिल्ह्यातील हे दोन्ही मित्र जुनी दुचाकी खरेदी करण्याच्या उद्देशाने वाणगाव येथे आले होते. मात्र, त्यांच्यावर दुचाकी चोरीचा संशय घेत काही जणांनी त्यांना घेरले. वस्तुस्थिती जाणून घेण्याऐवजी जमावाने कायदा हातात घेत दोघांना बेदम मारहाण करण्यास सुरुवात केली. लाथाबुक्क्या आणि पट्ट्यांनी मारहाण करूनही त्यांचे समाधान झाले नाही. या अमानुषतेचा कळस म्हणजे दोन्ही तरुणांना ट्रॅक्टरला बांधून ठेवण्यात आले. या क्रूर कृत्यामुळे दोघेही गंभीर जखमी झाले.
उपचार सुरू असतानाच संभाजीची प्राणज्योत मालवली!
या मारहाणीत गंभीर जखमी झालेल्या संभाजी सारूक याला उपचारासाठी दाखल करण्यात आले होते. मात्र, मृत्यूशी झुंज देताना अखेर त्याची प्राणज्योत मालवली. एका संशयातून तरुणाचा जीव जाण्याच्या या घटनेने धाराशिव आणि बीड जिल्ह्यात संतापाची लाट उसळली आहे. दुसऱ्या जखमी तरुणावर उपचार सुरू असल्याची माहिती आहे.
पाच जणांविरुद्ध खुनाचा गुन्हा; चार आरोपी जेरबंद!
या प्रकरणी मृत संभाजीच्या भावाने दिलेल्या फिर्यादीवरून नेकनूर पोलीस ठाण्यात पाच जणांविरुद्ध खुनाचा गुन्हा दाखल करण्यात आला आहे. पोलिसांनी चार आरोपींना अटक केली असून एका आरोपीची ओळख पटविण्याची प्रक्रिया सुरू असल्याची माहिती आहे. अटक केलेल्या आरोपींना न्यायालयात हजर केले जाणार असून पोलीस या प्रकरणाचा पुढील तपास करीत आहेत.
संशय आला म्हणून जीव घेण्याचा अधिकार कुणी दिला?
दुचाकी चोरीचा संशय होता तर पोलिसांच्या ताब्यात देऊन कायदेशीर कारवाई करता आली नसती का? कायदा आणि न्यायव्यवस्था असताना एखाद्याला स्वतःच शिक्षा देण्याचा अधिकार कुणी दिला? ट्रॅक्टरला बांधून बेदम मारहाण करण्याची ही विकृत मानसिकता समाजासाठी गंभीर इशारा आहे. केवळ संशयाच्या आधारावर एखाद्याचा जीव घेणाऱ्यांना कायद्याचा धाक राहिलेला नाही का, असा संतप्त सवाल या घटनेनंतर उपस्थित होत आहे.
या अमानुष कृत्यातील सर्व आरोपींवर कठोरात कठोर कारवाई करून पीडित कुटुंबाला न्याय मिळवून द्यावा, अशी मागणी नागरिकांतून होत आहे.
रोखठोक न्यूज — जनसामान्यांच्या अन्यायाविरुद्ध आवाज!
