🔴 केज नगरपंचायत घरकुल घोटाळा    घरकुल घोटाळ्याची चौकशी सुरू… पण ३७४ गोरगरीबांचे उद्ध्वस्त स्वप्न कोण पूर्ण करणार? ३ कोटी ६२ लाखांचा गैरव्यवहार; चौकशी एकीकडे — घरासाठी वाट पाहणारे लाभार्थी अजूनही रस्त्यावर

🔴 केज नगरपंचायत घरकुल घोटाळा 

  घरकुल घोटाळ्याची चौकशी सुरू… पण ३७४ गोरगरीबांचे उद्ध्वस्त स्वप्न कोण पूर्ण करणार?

३ कोटी ६२ लाखांचा गैरव्यवहार; चौकशी एकीकडे — घरासाठी वाट पाहणारे लाभार्थी अजूनही रस्त्यावर

रोखठोक न्यूज वार्ताहर 

केज : पंतप्रधान आवास योजनेअंतर्गत मंजूर झालेल्या ३७४ लाभार्थ्यांच्या घरकुल प्रकरणात केज नगरपंचायत कार्यकाळ (२०१९ ते २०२२) दरम्यान तब्बल ३ कोटी ६२ लाख रुपयांच्या घोटाळ्याची चर्चा सुरू असून चौकशी प्रक्रिया सुरू आहे. मात्र चौकशी कितीही काळ चालू राहिली तरी या प्रकरणात सर्वात मोठा प्रश्न आजही अनुत्तरित आहे — ज्यांच्या नावावर घरकुल मंजूर झाले, त्या गोरगरीब नागरिकांचे काय?

घराचे स्वप्न पाहणाऱ्या अनेक कुटुंबांनी कर्ज काढले, जुनी घरे पाडली, काहींनी भाड्याच्या घरात स्थलांतर केले. पण निधीतील अनियमितता, प्रशासकीय गोंधळ आणि कथित भ्रष्टाचारामुळे त्यांच्या स्वप्नांची अक्षरशः राखरांगोळी झाली. आजही अनेक लाभार्थी अर्धवट बांधकाम, रिकामी जागा आणि कागदोपत्री मंजुरी याच अवस्थेत अडकून पडले आहेत.

चौकशी यंत्रणा दोषी कोण हे शोधेल, जबाबदारांवर कारवाईही होईल; पण घरकुल न मिळालेल्या ३७४ कुटुंबांना पुन्हा योजना मिळणार का? हा सर्वात जिव्हाळ्याचा प्रश्न आहे. शासनाकडून पुनर्मंजुरी होणार का, नव्याने निधी मिळणार का, की लाभार्थींनाच पुन्हा शासकीय दारात हेलपाटे मारावे लागणार — याबाबत स्पष्टता नाही.

दरम्यान, त्या काळात नगरपंचायतीत सत्तेत असलेल्या जनविकास आघाडी व काँग्रेसच्या पदाधिकाऱ्यांकडे नागरिक थेट प्रश्न विचारत आहेत —

“चूक कोणाचीही असो, पण शिक्षा गरीबांना का?”

लाभार्थ्यांची मागणी स्पष्ट आहे :

घरकुलांची पुनर्तपासणी करून पात्रांना तात्काळ न्याय द्यावा

अडकलेला निधी पुन्हा मंजूर करावा

ज्यांचे नुकसान झाले त्यांना विशेष सवलत किंवा पुनर्मंजुरी द्यावी

चौकशी सुरू आहे, आरोप-प्रत्यारोप सुरू आहेत; मात्र प्रशासन आणि सत्ताधारी जर ठोस निर्णय घेत नाहीत, तर घराच्या आशेवर जगणाऱ्या शेकडो कुटुंबांचा विश्वास कायमचा ढासळण्याची भीती व्यक्त होत आहे.

आता प्रश्न एकच — घोटाळ्याची फाईल बंद होईल, पण गरीबांच्या घराचे दार कधी उघडणार?