मोकाट कुत्र्यांच्या टोळक्याचा हल्ला; ६ वर्षीय फरहान खुरेशी चा अखेर मृत्यू!

रोशन कॉलनीतील काळीज पिळवटून टाकणारी घटना; अंबाजोगाईकरांचा संताप, नगरपालिका प्रशासन आणखी किती जीव जाण्याची वाट पाहणार?

रोखठोक न्यूज | अंबाजोगाई

अंबाजोगाई शहरातून काळीज पिळवटून टाकणारी आणि शहराच्या सुरक्षिततेवर गंभीर प्रश्नचिन्ह निर्माण करणारी घटना समोर आली आहे. रोशन कॉलनी परिसरात मोकाट कुत्र्यांच्या टोळक्याने केलेल्या हल्ल्यात गंभीर जखमी झालेल्या अवघ्या सहा वर्षांच्या चिमुकल्याचा उपचारादरम्यान दुर्दैवी मृत्यू झाला. फरहान आस मोहम्मद कुरेशी असे मृत चिमुकल्याचे नाव आहे.

कुत्र्यांच्या हल्ल्यात चिमुकला गंभीर जखमी

काही दिवसांपूर्वी रोशन कॉलनी परिसरात फरहानवर मोकाट कुत्र्यांच्या टोळक्याने अचानक हल्ला केला. या हल्ल्यात तो गंभीर जखमी झाला. घटनेने परिसरात एकच खळबळ उडाली.

हल्ल्यानंतर फरहानला तातडीने उपचारासाठी अंबाजोगाई येथे दाखल करण्यात आले. मात्र, त्याची प्रकृती गंभीर झाल्याने पुढील उपचारासाठी त्याला लातूर येथे हलवण्यात आले.

मृत्यूशी झुंज अखेर अपयशी; कुटुंबावर दुःखाचा डोंगर

लातूर येथे डॉक्टरांकडून फरहानवर शर्थीचे उपचार सुरू होते. चिमुकला उपचारांना प्रतिसाद देईल आणि सुखरूप घरी परतेल, अशी आशा कुटुंबीय आणि नागरिकांना होती. मात्र, उपचार सुरू असतानाच फरहानची मृत्यूशी सुरू असलेली झुंज अखेर अपयशी ठरली.

अवघ्या सहा वर्षांच्या निष्पाप बालकाचा अशा दुर्दैवी पद्धतीने मृत्यू झाल्याने कुटुंबीयांवर दुःखाचा डोंगर कोसळला असून, या घटनेने संपूर्ण अंबाजोगाई शहरात हळहळ व्यक्त होत आहे.

मोकाट कुत्र्यांचा सुळसुळाट; प्रशासनाचे नियंत्रण कुठे?

फरहानच्या मृत्यूने अंबाजोगाई शहरातील मोकाट कुत्र्यांचा गंभीर प्रश्न पुन्हा ऐरणीवर आला आहे. शहरातील अनेक भागांत मोकाट कुत्र्यांचे टोळके फिरत असल्याच्या तक्रारी नागरिकांकडून केल्या जात आहेत.

लहान मुले, शाळकरी विद्यार्थी, महिला आणि ज्येष्ठ नागरिकांना रस्त्यावरून जाताना मोकाट कुत्र्यांची भीती वाटत असल्याचे नागरिकांचे म्हणणे आहे. कुत्र्यांच्या टोळक्यांचा वाढता वावर नागरिकांच्या सुरक्षिततेसाठी गंभीर धोका ठरत असताना प्रशासनाकडून ठोस उपाययोजना केव्हा होणार, असा संतप्त सवाल उपस्थित होत आहे.

आता तरी नगरपालिका जागी होणार का?

एका सहा वर्षांच्या चिमुकल्याचा जीव गेल्यानंतरही जर प्रशासनाने या प्रश्नाकडे गांभीर्याने पाहिले नाही, तर आणखी एखाद्या निष्पाप नागरिकाचा जीव गेल्यानंतरच प्रशासन जागे होणार का? असा सवाल अंबाजोगाईकरांकडून उपस्थित केला जात आहे.

मोकाट कुत्र्यांची संख्या, त्यांचे निर्बंधन, नागरिकांच्या सुरक्षिततेसाठी आवश्यक उपाययोजना आणि धोकादायक ठिकाणी तातडीची कारवाई याबाबत नगरपालिका प्रशासनाने ठोस पावले उचलण्याची मागणी आता जोर धरत आहे.

फरहानचा मृत्यू केवळ एक दुर्दैवी घटना नाही; हा प्रशासनासाठी इशारा!

फरहानच्या मृत्यूने एका कुटुंबाचे जग उद्ध्वस्त झाले आहे. मात्र, या घटनेने शहरातील नागरिकांच्या सुरक्षेचा प्रश्नही ऐरणीवर आणला आहे. मोकाट कुत्र्यांच्या समस्येकडे दुर्लक्ष करण्याची किंमत एका निष्पाप चिमुकल्याला जीव देऊन मोजावी लागली आहे.

आता अंबाजोगाई नगरपालिका आणि संबंधित प्रशासन फरहानच्या मृत्यूची दखल घेऊन मोकाट कुत्र्यांच्या समस्येवर ठोस आणि तातडीची उपाययोजना करणार का? याकडे संपूर्ण अंबाजोगाईकरांचे लक्ष लागले आहे.

रोखठोक न्यूज, जनसामान्यांच्या अन्यायाविरुद्ध आवाज