🟥 रोखठोक न्यूजच्या दणक्यानंतर प्रशासन हलले! जिल्हाधिकाऱ्यांची केजमध्ये धडक; कोट्यवधींच्या प्रकल्पांवर थेट आढावा 🟨 केजडी नदी व राजीव गांधीच तलाव विकासातील प्रश्न उपस्थित होताच यंत्रणा सतर्क • कामांच्या गुणवत्तेबाबत कडक आदेश.

🟥 रोखठोक न्यूजच्या दणक्यानंतर प्रशासन हलले!

जिल्हाधिकाऱ्यांची केजमध्ये धडक; कोट्यवधींच्या प्रकल्पांवर थेट आढावा

🟨 केजडी नदी व राजीव गांधीच तलाव विकासातील प्रश्न उपस्थित होताच यंत्रणा सतर्क • कामांच्या गुणवत्तेबाबत कडक आदेश

रोखठोक न्यूज | केज प्रतिनिधी

केजडी नदी विकास प्रकल्प व राजीव गांधी तलाव सुशोभीकरणातील कोट्यवधी रुपयांच्या निधीबाबत रोखठोक न्यूजने सातत्याने उघड केलेल्या वास्तवाचा अखेर मोठा परिणाम दिसून आला असून बीड जिल्ह्याचे जिल्हाधिकारी विवेक जॉन्सन यांनी आज केज येथे धडक देत थेट आढावा बैठक घेतली. त्यामुळे आतापर्यंत मौन बाळगणाऱ्या प्रशासनाची चांगलीच धावपळ उडाल्याचे चित्र पाहायला मिळाले.

केंद्र शासन पुरस्कृत अमृत 2.0 अभियान अंतर्गत केज नगरपंचायत क्षेत्रात सुरू असलेल्या हरित क्षेत्र विकास व तलाव पुनरुज्जीवन प्रकल्पांबाबत नगरपंचायत कार्यालयात सविस्तर बैठक घेण्यात आली. प्रकल्पांची सद्यस्थिती, निधी खर्च, कामांची गुणवत्ता तसेच निर्धारित कालमर्यादेत काम पूर्ण करण्याबाबत संबंधित अधिकारी व कंत्राटदारांना स्पष्ट व कडक निर्देश देण्यात आले.

रोखठोक न्यूजने यापूर्वी प्रसिद्ध केलेल्या बातम्यांमधून ₹14.55 कोटींचा नदी विकास प्रकल्प आणि ₹18 कोटींहून अधिक खर्चाच्या तलाव सुशोभीकरण कामांवर गंभीर प्रश्न उपस्थित करण्यात आले होते. प्रत्यक्ष ठिकाणी विकासाचा लवलेश नसताना कागदावर खर्च दाखवला जात असल्याचा संशय व्यक्त झाल्याने नागरिकांमध्ये संतापाची लाट उसळली होती.

यानंतर जिल्हाधिकाऱ्यांनी राजीव गांधी तलाव येथे प्रत्यक्ष भेट देऊन हरित क्षेत्र विकास व सरोवर पुनरुज्जीवन कामांची पाहणी केली. पर्यावरण संवर्धन, पाणी साठवण क्षमता वाढ आणि नागरिकांसाठी सुरक्षित सार्वजनिक सुविधा निर्माण करण्यासाठी कामे दर्जेदार पद्धतीने पूर्ण करण्याच्या स्पष्ट सूचना त्यांनी दिल्या.

दरम्यान, रोखठोक न्यूजच्या दणक्यामुळेच प्रशासन मैदानात उतरले, अशी चर्चा शहरात रंगली असून आता खऱ्या अर्थाने कामे वेग घेणार का, की पुन्हा कागदोपत्रीच विकास राहणार? याकडे संपूर्ण केजकरांचे लक्ष लागले आहे.