डॉ. दिनकर राऊत यांना ‘लोकमत अवॉर्ड २०२६’; बालरुग्णसेवेत उल्लेखनीय कार्याची दखल
रोखठोक न्यूज वार्ताहर
केज शहरातील नामांकित बालरोगतज्ज्ञ डॉ. दिनकर राऊत यांना ‘लोकमत’ समूहाकडून प्रदान करण्यात येणारा प्रतिष्ठेचा लोकमत अवॉर्ड २०२६ जाहीर झाला असून, त्यांच्या वैद्यकीय क्षेत्रातील उल्लेखनीय कार्याची दखल घेण्यात आली आहे.
ग्रामीण भागात अत्याधुनिक बालरुग्णसेवा उपलब्ध करून देण्याच्या उद्देशाने डॉ. राऊत यांनी केज येथे ‘योगिता बाल रुग्णालय’ सुरू केले. अल्पावधीतच या रुग्णालयाने बीड जिल्ह्यासह मराठवाडा परिसरात आपली वेगळी ओळख निर्माण केली आहे. विशेष म्हणजे, NABH मानांकनाच्या दिशेने वाटचाल करणाऱ्या या रुग्णालयात नवजात व बालरुग्णांसाठी अत्याधुनिक सुविधा उपलब्ध करून देण्यात आल्या आहेत.
केज येथील नामांकित बालरोगतज्ज्ञ डॉ. दिनकर राऊत यांच्या वैद्यकीय क्षेत्रातील संशोधन कार्यालाही आंतरराष्ट्रीय स्तरावर मान्यता मिळाली असून, त्यांच्या बालरोग विषयक शोध निबंधाला आंतरराष्ट्रीय जर्नलमध्ये स्थान मिळाले आहे. ग्रामीण भागातील बालरुग्णांवर आधारित त्यांच्या अभ्यासात उपचारपद्धतीतील प्रभावी निष्कर्ष मांडण्यात आले असून, या संशोधनामुळे वैद्यकीय क्षेत्रात नवे दिशादर्शन होण्याची अपेक्षा व्यक्त केली जात आहे. त्यांच्या या यशामुळे केजसह संपूर्ण बीड जिल्ह्याचा गौरव वाढला आहे.
डॉ. राऊत यांच्या सेवाभावी वृत्तीमुळे अनेक गंभीर बालरुग्णांना नवजीवन मिळाले आहे. केवळ ६५० ग्रॅम वजनाच्या अतिदुर्बल बालिकेला वाचवण्याचा धाडसी पराक्रम असो, किंवा सर्पदंश झालेल्या बालकाचे यशस्वी उपचार — अशा अनेक जीव वाचवणाऱ्या घटना त्यांच्या कार्याची साक्ष देतात.
त्यांच्या नेतृत्वाखालील वैद्यकीय पथकाने वेळोवेळी अत्यंत गुंतागुंतीच्या प्रकरणांवर यशस्वी उपचार करून ग्रामीण भागातील पालकांचा विश्वास संपादन केला आहे. कमी संसाधनांमध्येही उच्च दर्जाची सेवा देण्याचा त्यांचा प्रयत्न कौतुकास्पद मानला जातो.
डॉ. दिनकर राऊत यांच्या या कार्यामुळे केवळ केजच नव्हे, तर संपूर्ण बीड जिल्ह्याचा गौरव वाढला आहे. ‘लोकमत अवॉर्ड २०२६’ हा त्यांच्या कार्याचा सन्मान असून, यामुळे वैद्यकीय क्षेत्रात कार्य करणाऱ्या इतरांना देखील प्रेरणा मिळणार आहे.